वाढदिवसानिमित्त विद्यार्थ्यांना स्पोर्ट्स किट व उपाहार वाटप; सामाजिक कार्यकर्ते गणेश कडभने यांचा अभिनव उपक्रम

ByK.B.Gaikwad

Jul 13, 2026

जामखेड प्रतिनिधी सुनिल पुलवळे

आजच्या काळात वाढदिवस मोठ्या प्रमाणावर खर्च करून साजरे करण्याची प्रथा वाढत असताना, समाजासाठी काहीतरी सकारात्मक करण्याचा संदेश देणारा आदर्श उपक्रम युवा सामाजिक कार्यकर्ते गणेश कडभने यांनी राबविला. आपल्या वाढदिवसानिमित्त त्यांनी जिल्हा परिषद प्राथमिक शाळा, कडभनवाडी येथील विद्यार्थ्यांना स्पोर्ट्स किट तसेच उपाहाराचे वाटप करून सामाजिक बांधिलकीचे दर्शन घडविले.

शालेय जीवनात शिक्षणाइतकेच क्रीडा क्षेत्राचेही महत्त्व अनन्यसाधारण आहे. विद्यार्थ्यांमध्ये शारीरिक तंदुरुस्ती, आत्मविश्वास, शिस्त आणि सांघिक भावना विकसित व्हावी, या उद्देशाने शाळेतील विद्यार्थ्यांना आवश्यक स्पोर्ट्स किटचे वितरण करण्यात आले. त्यानंतर सर्व विद्यार्थ्यांना उपाहार देण्यात आला. या उपक्रमामुळे विद्यार्थ्यांच्या चेहऱ्यावर आनंद झळकला असून, शिक्षक व पालकांनीही या समाजोपयोगी उपक्रमाचे मनापासून स्वागत केले.

कार्यक्रमात उपस्थित मान्यवरांनी आपल्या मनोगतात वाढदिवसासारखा वैयक्तिक आनंदाचा दिवस समाजसेवेशी जोडण्याची संकल्पना निश्चितच प्रेरणादायी असल्याचे सांगितले. अशा उपक्रमांमुळे विद्यार्थ्यांमध्ये शिक्षणाबरोबरच क्रीडाप्रती आवड निर्माण होण्यास मदत होते, तसेच समाजातील इतरांनीही वाढदिवस, लग्नाचा वाढदिवस किंवा इतर आनंदाचे क्षण सामाजिक उपक्रमांद्वारे साजरे करण्याची प्रेरणा घ्यावी, असे मत व्यक्त करण्यात आले.

यावेळी पोलीस पाटील महादेव वराट, उपसरपंच राजाभाऊ वराट, आरोग्य सेवक डॉ. लहू जेधे, युवा नेते अभिषेक पाटील, प्रतीक मुरूमकर, नागनाथ मुरूमकर, ग्रामपंचायत सदस्य सचिन नेमाने, शाळा व्यवस्थापन समितीचे अध्यक्ष सुशेन कडभने, उपाध्यक्ष निलेश नेमाने, युवा नेते ईश्वर नेमाने, शरद मिसाळ, महारुद्र कदम, बाळासाहेब नेमाने, अक्षय नेमाने, अनिल मिसाळ, रामहरी राजपुरे, विनोद तांबे, संदीप कदम, धनराज कडभने, अंकुश कडभने, रमेश नेमाने, गणेश निकम, बंटी सांगळे, माऊली कदम, सागर नेमाने, सोमा नेमाने, महेश कडभने, सचिन तांबे, सचिन मिसाळ, ज्ञानेश्वर नेमाने, दीपक पुलवळे, ओंकार कडभने, प्रकाश कडभने आणि प्रशांत कडभने यांच्यासह गावातील ग्रामस्थ, युवक, शिक्षक, पालक व विद्यार्थी मोठ्या संख्येने उपस्थित होते.

कार्यक्रमाचे नियोजन अत्यंत उत्साहपूर्ण वातावरणात पार पडले. उपस्थितांनी गणेश कडभने यांना वाढदिवसाच्या शुभेच्छा देत त्यांच्या समाजाभिमुख कार्याचे कौतुक केले. विद्यार्थ्यांच्या शिक्षणाबरोबरच क्रीडा विकासासाठी केलेली ही मदत निश्चितच प्रेरणादायी असून, अशा उपक्रमांमुळे समाजात सकारात्मक विचारांची पेरणी होत असल्याची भावना उपस्थितांनी व्यक्त केली. विद्यार्थ्यांच्या चेहऱ्यावर उमटलेले समाधान आणि आनंद हेच या वाढदिवसाचे खरे औचित्य ठरल्याची भावना यावेळी सर्वांनी व्यक्त केली.