घणसोली- प्रभागातील नागरिकांच्या आरोग्यासाठी गणेश सकपाळ सामाजिक संस्थेचा पुढाकार; मोफत वैद्यकीय शिबिराला उत्स्फूर्त प्रतिसाद

नवी मुंबई : प्रभागातील नागरिकांना दर्जेदार आरोग्यसेवा उपलब्ध करून देण्याच्या उद्देशाने गणेश सकपाळ सामाजिक संस्था आणि डी.वाय. पाटील यांच्या संयुक्त विद्यमाने आयोजित करण्यात आलेल्या मोफत सर्वरोग निदान व वैद्यकीय शिबिराला नागरिकांचा उत्स्फूर्त प्रतिसाद लाभला. महिला, ज्येष्ठ नागरिक, युवक-युवती तसेच लहान मुलांनी मोठ्या संख्येने उपस्थित राहून या शिबिराचा लाभ घेतला.

शिबिरात अनुभवी स्त्रीरोग, बालरोग, त्वचारोग तसेच इतर विविध आजारांवरील तज्ज्ञ डॉक्टरांनी नागरिकांची सखोल आरोग्य तपासणी केली. तपासणीनंतर रुग्णांना आवश्यक ते वैद्यकीय मार्गदर्शन देण्यात आले. तसेच गरजूंना मोफत औषधांचेही वितरण करण्यात आले.

आरोग्य तपासणीबरोबरच नागरिकांच्या विविध आरोग्यविषयक शंकांचे निरसन करण्यात आले. बदलती जीवनशैली, आहार, नियमित तपासणी आणि आजारांचे वेळेत निदान याबाबत डॉक्टरांनी महत्त्वपूर्ण मार्गदर्शन केल्याने नागरिकांनी या उपक्रमाचे स्वागत केले.

शिबिरादरम्यान नागरिकांनी मोठ्या संख्येने सहभाग नोंदवत या उपक्रमाचे स्वागत केले. परिसरात सातत्याने राबविण्यात येणाऱ्या आरोग्यविषयक आणि सामाजिक उपक्रमांबद्दल त्यांनी आयोजकांचे आभार व्यक्त केले. नागरिकांच्या आरोग्याची काळजी घेणे आणि त्यांना दर्जेदार वैद्यकीय सेवा उपलब्ध करून देणे, या सामाजिक बांधिलकीतून या शिबिराचे आयोजन करण्यात आल्याचे आयोजकांनी सांगितले.

या शिबिराच्या यशस्वी आयोजनासाठी सहकार्य करणारे डी.वाय. पाटील यांचे वैद्यकीय पथक, सर्व तज्ज्ञ डॉक्टर, स्वयंसेवक तसेच उपस्थित नागरिकांचे आयोजकांनी आभार मानले.

https://lokbhavanmarathinews.com

https://student.maharashtra.gov.in