साकत (प्रतिनिधी)
साकत येथे जागतिक महिला दिनानिमित्त सर्व रोग निदान शिबिर
ग्रामीण रुग्णांसाठी मोफत आरोग्य शिबिरे ठरतात मोठा दिलासा – मा .सभापती डॉ. भगवान मुरूमकर
ग्रामीण भागातील नागरिकांना दर्जेदार आरोग्य सेवा उपलब्ध करून देण्याच्या उद्देशाने साकत येथे जागतिक महिला दिनानिमित्त मोफत सर्व रोग निदान शिबिराचे आयोजन करण्यात आले. श्री साकेश्वर हॉस्पिटल, साकत आणि जामखेड येथील सुप्रसिद्ध समर्थ मल्टीस्पेशालिटी हॉस्पिटल यांच्या संयुक्त विद्यमाने हे शिबिर पार पडले.
या शिबिराला साकत गावासह पंचक्रोशीतील नागरिकांनी मोठ्या संख्येने प्रतिसाद दिला. अनेक नागरिकांनी मोफत तपासणी व वैद्यकीय सल्ल्याचा लाभ घेतला. ग्रामीण भागातील लोकांना शहरात जाऊन उपचार घेणे अनेक वेळा कठीण ठरते. त्यामुळे अशा प्रकारची आरोग्य शिबिरे गावात आयोजित करण्यात येणे नागरिकांसाठी मोठा दिलासा ठरते.
ग्रामीण आरोग्यासाठी अशा शिबिरांचे मोठे महत्त्व-मा .सभापती डॉ. भगवान मुरूमकर
या उपक्रमाबद्दल बोलताना मा. सभापती डॉ. भगवान मुरूमकर म्हणाले की, ग्रामीण भागातील नागरिकांना वेळेवर आरोग्य तपासणीची सुविधा मिळणे अत्यंत गरजेचे आहे. अनेकदा ग्रामीण भागातील लोक आर्थिक अडचणींमुळे किंवा योग्य सुविधा उपलब्ध नसल्यामुळे तपासणी करून घेत नाहीत. त्यामुळे लहान आजार पुढे गंभीर स्वरूप धारण करतात. अशा प्रकारच्या मोफत आरोग्य शिबिरांमुळे अनेक गंभीर आजारांचे लवकर निदान होऊन रुग्णांना योग्य उपचार मिळण्यास मदत होते.
श्री साकेश्वर हॉस्पिटल व समर्थ मल्टीस्पेशालिटी हॉस्पिटल यांच्या संयुक्त विद्यमाने आयोजित करण्यात आलेल्या या शिबिरामुळे साकत गाव तसेच पंचक्रोशीतील अनेक गरजू रुग्णांना मोठा दिलासा मिळाला आहे. अशा सामाजिक व आरोग्यविषयक उपक्रमांमुळे ग्रामीण भागातील नागरिकांना दर्जेदार वैद्यकीय सेवा गावातच उपलब्ध होत असल्याचेही त्यांनी यावेळी सांगितले.
श्री साकेश्वर हॉस्पिटलची ग्रामीण भागासाठी २४ तास सेवा
श्री साकेश्वर हॉस्पिटलच्या माध्यमातून साकत गाव तसेच परिसरातील सर्व गरजू रुग्णांना २४ तास वैद्यकीय सेवा उपलब्ध करून दिली जाते. साकतसारख्या ग्रामीण भागात दिवस-रात्र डॉक्टरांची उपलब्धता असणे ही नागरिकांसाठी अत्यंत महत्त्वाची बाब ठरत आहे. विशेषतः रात्रीच्या वेळी अचानक आजारपण किंवा अपघात झाल्यास रुग्णांना शहरात नेण्याची वेळ अनेकदा येते. मात्र साकत येथेच डॉक्टर उपलब्ध असल्यामुळे रुग्णांना तातडीने उपचार मिळणे शक्य होत आहे.
रात्रीच्या वेळी रुग्णांना तातडीची तपासणी, प्राथमिक उपचार तसेच आवश्यक मार्गदर्शन दिले जात असल्यामुळे अनेक गंभीर परिस्थिती टाळता येतात. त्यामुळे नागरिकांना शहरात जाण्याचा त्रास वाचतो तसेच वेळ आणि पैशांचीही मोठ्या प्रमाणात बचत होते.
याशिवाय हॉस्पिटलमध्ये अल्पदरात उपचार सुविधा उपलब्ध करून दिल्या जात असल्यामुळे आर्थिकदृष्ट्या दुर्बल घटकांनाही उपचार घेणे सोपे झाले आहे. साकत तसेच परिसरातील अनेक नागरिकांसाठी श्री साकेश्वर हॉस्पिटल हे एक विश्वासार्ह आरोग्यसेवा केंद्र बनले आहे.
विविध आजारांवर तज्ज्ञ डॉक्टरांकडून तपासणी व मार्गदर्शन
या आरोग्य शिबिरात विविध आजारांबाबत तपासणी, निदान तसेच उपचाराबाबत मार्गदर्शन करण्यात आले. अपेंडिक्स, हर्निया, मुळव्याध, प्रोस्टेट, संधिवात, आमवात, मणक्याचे आजार, मधुमेह, रक्तदाब तसेच विविध त्वचा विकार यांसारख्या आजारांची तपासणी करण्यात आली.
यासोबतच गुडघेदुखी, पाठदुखी, सांधेदुखी अशा समस्यांवर तज्ज्ञ डॉक्टरांकडून मार्गदर्शन देण्यात आले. अनेक नागरिकांनी आपापल्या आरोग्य समस्यांबाबत डॉक्टरांशी चर्चा करून योग्य सल्ला घेतला.
शिबिरात आलेल्या रुग्णांना मोफत वैद्यकीय सल्ला, तपासणी तसेच आवश्यकतेनुसार मोफत औषधोपचार देण्यात आले. त्यामुळे आर्थिक अडचणींमुळे वेळेवर उपचार न घेऊ शकणाऱ्या अनेक रुग्णांना या शिबिराचा मोठा लाभ झाला.
तज्ज्ञ डॉक्टरांचे मार्गदर्शन लाभले
या शिबिरासाठी तज्ज्ञ मार्गदर्शक म्हणून डॉ. प्रशांत जाधव (एमबीबीएस, एमडी मेडिसिन) यांनी उपस्थित राहून विविध आजारांबाबत नागरिकांना सविस्तर मार्गदर्शन केले.
तसेच हाडांचे तज्ज्ञ डॉ. अजय क्षिरसागर (एमबीबीएस, डी. ऑर्थो) यांनी हाडे, सांधे व मणक्यांच्या आजारांबाबत तपासणी करून उपचाराविषयी सल्ला दिला.
याशिवाय डॉ. स्नेहल मुरूमकर (बी.एच.एम.एस.) यांनीही रुग्णांची तपासणी करून आवश्यक मार्गदर्शन केले. तज्ज्ञ डॉक्टरांच्या उपस्थितीमुळे अनेक रुग्णांना त्यांच्या जुन्या व क्लिष्ट आजारांबाबत योग्य उपचाराची दिशा मिळाली.
ही बातमीही वाचा-Sakat-साकत येथे मोफत नेत्र तपासणी शिबिर; आरोग्य सेवा हीच ईश्वर सेवा – ह.भ.प. उत्तम महाराज वराट https://lokbhavanmarathinews.com/1096/mofat-netra-tapasani-sakat/